ಸಾಮಾನ್ಯ ಜ್ಞಾನ ಮತ್ತು ಪ್ರಚಲಿತ ವಿದ್ಯಮಾನ ಕ್ವಿಜ್- ಏಪ್ರಿಲ್,10,2017

2017 ರಾಷ್ಟ್ರೀಯ ಮಕ್ಕಳ ಚಲನಚಿತ್ರೋತ್ಸವಕ್ಕೆ ಹೈದ್ರಾಬಾದಿನಲ್ಲಿ ಚಾಲನೆ ನೀಡಲಾಯಿತು. ಕೇಂದ್ರ ಮಾಹಿತಿ ಮತ್ತು ಪ್ರಸರಣ ಖಾತೆ ಸಚಿವ ವೆಂಕಯ್ಯನಾಯ್ಡು ಅವರ ಈ ಸಿನಿಮೋತ್ಸವಕ್ಕೆ ಚಾಲನೆ ನೀಡಿದರು. ಮೂರು ದಿನಗಳ ಈ ಸಿನಿಮೋತ್ಸವವನ್ನು ಚಿಲ್ಡ್ರನ್ ಫಿಲ್ಮ್ ಸೊಸೈಟಿ ಆಯೋಜಿಸಿದೆ.

ರಾಷ್ಟ್ರೀಯ ಬಾಸ್ಕೆಟ್ ಬಾಲ್ ಅಸೋಸಿಯೇಷನ್ (NBA) ದೇಶದ ಮೊಟ್ಟ ಮೊದಲ ಬಾಸ್ಕೆಟ್ ಬಾಲ್ ಶಾಲೆಯನ್ನು ಮುಂಬೈನಲ್ಲಿ ಆರಂಭಿಸಿದೆ. 6-18 ವರ್ಷದೊಳಗಿನ ಬಾಲಕ-ಬಾಲಕಿಯರು ಈ ಶಾಲೆಯಲ್ಲಿ ತರಭೇತಿ ಪಡೆದುಕೊಳ್ಳಬಹುದಾಗಿದೆ.

ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಅಂಟೊನಿಯೊ ಗುಟೆರಸ್ 19 ವರ್ಷದ ಮಲಾಲ ಯೂಸೂಫ್ ಗೆ ಅತ್ಯಂತ ಕಿರಿಯ ಶಾಂತಿ ದೂತ ಪಟ್ಟವನ್ನು ಘೋಷಿಸಿದ್ದಾರೆ. ವಿಶ್ವಸಂಸ್ಥೆಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಆಂಟೋನಿಯೋ ಗುಟೆರಸ್, ವಿಶ್ವಸಂಸ್ಥೆಯ ಆದರ್ಶಗಳು ಮತ್ತು ಉದ್ದೇಶಗಳಿಗೆ ಮಲಾಲ ಸೇವೆ ಹಾಗೂ ಮಹಿಳೆಯರು ಸೇರಿದಂತೆ ಎಲ್ಲಾ ವರ್ಗದ ಜನತೆಯ ಹಕ್ಕನ್ನು ಸಮರ್ಥಿಸಿಕೊಂಡ ಧೈರ್ಯಕ್ಕಾಗಿ ಅತ್ಯಂತ ಕಿರಿಯ ಶಾಂತಿದೂತ ಪಟ್ಟ ನೀಡಲಾಗುತ್ತಿದೆ ಎಂದು ಹೇಳಿದ್ದಾರೆ.

ಯುಕೆ ಯಲ್ಲಿ ನೆಲೆಸಿರುವ ಭಾರತೀಯ ಮೂಲದ ಶಿಕ್ಷಣ ತಜ್ಞೆ ಆಶಾ ಖೇಮ್ಕಾ ಅವರಿಗೆ “ವರ್ಷದ ಏಷ್ಯಾ ಉದ್ಯಮಿ” ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಪ್ರಸ್ತುತ ಇವರು ಇಂಗ್ಲೆಂಡಿನ ವೆಸ್ಟ್ ನಾಟಿಂಗ್ಶೈರ್ ಕಾಲೇಜಿನಲ್ಲಿ ಪ್ರಾಂಶುಪಾಲರಾಗಿ ಸೇವೆ ಸಲ್ಲಿಸಿದ್ದಾರೆ.

ಉರುಗ್ವೆ ರಾಷ್ಟ್ರ ಗಾಂಜಾ ಉತ್ಪಾದನೆ, ಮಾರಾಟ ಮತ್ತು ಸೇವನೆಯನ್ನು ಕಾನೂನು ಬದ್ದಗೊಳಿಸಿದೆ. ಆ ಮೂಲಕ ಗಾಂಜಾ ಉತ್ಪಾದನೆ, ಮಾರಾಟ ಮತ್ತು ಸೇವನೆಯನ್ನು ಕಾನೂನು ಬದ್ದಗೊಳಿಸಿದ ವಿಶ್ವದ ಮೊದಲ ರಾಷ್ಟ್ರವೆನಿಸಿದೆ.

ಬಡವರಿಗೆ ಸಬ್ಸಿಡಿ ದರದಲ್ಲಿ ಆಹಾರ ನೀಡಲು ಮಧ್ಯ ಪ್ರದೇಶ ಸರ್ಕಾರ “ದೀನದಯಾಳ್ ರಸೋಯಿ ಯೋಜನೆ”ಯನ್ನು ಜಾರಿಗೆ ತಂದಿದೆ. ಯೋಜನೆಯಡಿ ರೂ 5ಕ್ಕೆ ಊಟ ದೊರೆಯಲಿದೆ.

ಹಿಂದಿ ಚಿತ್ರ ಧಾನಕ್ 64ನೇ ರಾಷ್ಟ್ರೀಯ ಚಲನಚಿತ್ರೋತ್ಸವ ಪ್ರಶಸ್ತಿಯಲ್ಲಿ ಅತ್ಯುತ್ತಮ ಮಕ್ಕಳ ಸಿನಿಮಾ ಪ್ರಶಸ್ತಿಗೆ ಭಾಜನವಾಗಿದೆ. ನಾಗೇಶ್ ಕುಕುನೂರ್ ಈ ಸಿನಿಮಾದ ಕಥೆ ಯನ್ನು ಬರೆದಿದ್ದು, ನಿರ್ದೇಶನ ಸಹ ಮಾಡಿದ್ದಾರೆ.

ಭಾರತದ ಮೊದಲ ಸೂಕ್ಷ ನಾಟಕ ಉತ್ಸವ “ಥೆಪ್ಸಿಸ್” ನವದೆಹಲಿಯ “ಇಂದಿರಾ ಗಾಂಧಿ ನ್ಯಾಷನಲ್ ಸೆಂಟರ್ ಫಾರ್ ದಿ ಆಟ್ಸ್”ನಲ್ಲಿ ಏಪ್ರಿಲ್ 9 ರಂದು ಆರಂಭಗೊಂಡಿತು. ಈ ಉತ್ಸವದಲ್ಲಿ ಹತ್ತು ನಿಮಿಷ ಅವಧಿಗಿಂತ ಕಡಿಮೆ ಅವಧಿಯ ಸರಿ ಸುಮಾರು 25 ಕಿರು ನಾಟಕಗಳನ್ನು ಪ್ರದರ್ಶಿಸಲಾಗುವುದು.

12ನೇ ಭಾರತ-ಮಂಗೋಲಿಯಾ ಮಿಲಿಟರಿ ಅಭ್ಯಾಸ “ನೊಮಾಡಿಕ್ ಎಲಿಫೆಂಟ್” ಮಿಜೋರಾಂನ ವೈರೆಂಗ್ಟೆಯಲ್ಲಿ ಆರಂಭಗೊಂಡಿದೆ. ಏಪ್ರಿಲ್ 5, 2017 ರಿಂದ ಏಪ್ರಿಲ್ 18, 2017 ರವರೆಗೆ ಈ ಮಿಲಿಟರಿ ಅಭ್ಯಾಸ ನಡೆಯಲಿದೆ. ಭಯೋತ್ಪಾದನೆ ನಿಗ್ರಹ, ಒಳನುಸುಳುವಿಕೆ ವಿರುದ್ದ ಕಾರ್ಯಾಚರಣೆ ಕುರಿತಾದ ತರಭೇತಿಯಲ್ಲಿ ಉಭಯ ದೇಶಗಳ ಸೇನಾ ಪಡೆಗಳು ತಾಲೀಮು ನಡೆಸಲಿವೆ.